Kosova e ka zhvilluar të mërkurën stërvitjen e katërt në kuadër të përgatitjeve për dy ndeshjet miqësore të këtij muaji, kundër Armenisë dhe Komoreve.

Seanca është mbajtur në stadiumin “Fadil Vokrri” dhe është karakterizuar me angazhim maksimal dhe atmosferë shumë pozitive brenda grupit.

Kosova është e vendosur të vazhdojë me rezultate pozitive, teksa përgatitjet intensive për miqësoren ndaj Armenisë po shkojnë në mënyrën më të mirë të mundshme.

Portieri Visar Bekaj, një nga lojtarët më me përvojë në grup, ka theksuar rëndësinë e këtyre ditëve të fundit të stërvitjeve dhe ka vlerësuar frymën e bashkëpunimit që ka mbretëruar brenda ekipit.

“Stërvitjet po shkojnë shumë mirë dhe atmosfera është e jashtëzakonshme. Lojtarët e rinj janë përshtatur shumë mirë, ndërsa ne, lojtarët më me përvojë, jemi kujdesur t’i mirëpresim. Këto dy ndeshje janë të rëndësishme për ne – gjithmonë luajmë për fitore dhe do të japim 100%”, ka thënë Bekaj.

Nga ana tjetër, anësori i shpejtë Ermal Krasniqi ka ndarë përshtypjet e tij për intensitetin e stërvitjeve dhe analizat që po bëhen për kundërshtarin. Ai ka folur për përkushtimin maksimal të grupit dhe për gatishmërinë e ekipit për të dhënë gjithçka në fushë.

“Sot ishte dita e katërt e stërvitjeve. Grupi është shumë i mirë, të gjithë po japin maksimumin dhe po e analizojmë kundërshtarin në detaje. Armenia është një ekip shumë më i fortë sesa më parë, por ne jemi gati të japim më të mirën dhe të shënojmë një fitore të rëndësishme për të gjithë shqiptarët”, deklaroi Krasniqi.

Kosova do të zhvillojë nesër në orën 17:00 seancën e fundit stërvitore para përballjes me Armeninë.